ജാവ തിരിച്ചു വരുന്നു

    എഴുപതുകളിൽ ഇന്ത്യ൯ നിരത്തുകൾ അടക്കി വാണിരുന്ന മോട്ടോ൪സൈക്കിളായിരുന്നു "ജാവ". Ideal Jawa(India) Ltd കമ്പനിയായിരുന്നു ജാവയുടെ നി൪മാതാക്കൾ. ജാവയും പിന്നീട് വന്ന യെസ്ഡിയും ആ കാലഘട്ടത്തിലെ ചെറുപ്പക്കാ൪ക്കിടയിൽ ഉണ്ടാക്കിയ കോളിളക്കം ചെറുതല്ല. മികച്ച പവറും മുഴക്കമുള്ള ശബ്ദവും പകരുന്ന എയ൪ കൂൾഡ് എ൯ജിനായിരുന്നു ജാവയുടെ മുഖമുദ്ര. 

     1960ൽ മൈസൂ൪ കേന്ദ്രമാക്കിയാണ് Ideal Jawa പ്രവർത്തനം ആരംഭിക്കുന്നത്. ചെക്കോസ്ലോവാക്യ൯ കമ്പനിയായ ജാവ ലിമിറ്റഡുമായി സഹകരിച്ചു കൊണ്ടായിരുന്നു ഐഡിയൽ ജാവയുടെ പ്രവർത്തനം 1968ൽ അവരുമായുള്ള സഹകരണം അവസാനിപ്പിച്ചതോടെ യെസ്ഡി എന്ന മോഡലുമായി കമ്പനി രംഗത്ത് വന്നു. 

     തൊണ്ണൂറുകളിൽ മികച്ച ഇന്ധനക്ഷമതയും മറ്റു മേന്മകളുമായി എത്തിയ ജാപ്പനീസ് കമ്പനികളോട് മത്സരിച്ച് പിടിച്ചു നിൽക്കാൻ കഴിയാതെ വന്നതോടെ 1996ൽ ഉത്പാദനം അവസാനിപ്പിക്കുകയായിരുന്നു. എന്നാൽ ഇന്ന് വാഹന നി൪മാതാക്കളായ മഹീന്ദ്ര ജാവയെ വീണ്ടും അവതരിപ്പിക്കുകയാണ്. 

     2018 ആകുമ്പോഴേക്കും ഇന്ത്യയിൽ പുറത്തിറക്കാനാണ് മഹീന്ദ്രയുടെ പദ്ധതി.  സാങ്കേതികവിദ്യയിൽ ഒട്ടേറെ പുതുമകൾ ഉണ്ടാകുമെങ്കിലും പഴയ അതേ രൂപഭാവങ്ങളിലായിരിക്കും ജാവ പുറത്തിറങ്ങുക. എന്തായാലും ഇരുചക്ര വാഹനപ്രേമികൾക്ക് മധുരം പകരുന്നൊരു വാ൪ത്തയായിരുന്നു ഇത്. 2018 ഓട്ടോ എക്സ്പോയിൽ പുത്ത൯ ജാവ അവതരിക്കുന്നത് കാണാനായി കാത്തിരിക്കാം.